kalam-e-rind mein aksar haqiqat aa hi jati hai

kalām-e-rind meñ aksar haqīqat aa hī jaatī hai

husn ik chiiz hai aisī tabī'at aa hī jaatī hai

hazāroñ masjideñ hoñ jannateñ hoñ 'arsh hoñ lekin

na ho pesh-e-nazar dilbar qiyāmat aa hī jaatī hai

ka.ī nā-kāmiyāñ mahrūmiyāñ rusvā.iyāñ lekar

'umūman ḳhāna-e-dil meñ mohabbat aa hī jaatī hai

ḳhudī ḳhud-e'timādī meñ badal jaa.e to bandoñ ko

ḳhudā se sar-kashī karne kī naubat aa hī jaatī hai

zabān-e-’ishq gar samjhā.e farmān-e-kHudāvandī

to mai-ḳhāne kī zad meñ phir sharī'at aa hī jaatī hai

faqīr-e-‘qādrī’ jo dekhte haiñ chashm-e-bīnā se

to bande ko ḳhudā kahne kī jur.at aa hī jaatī hai

kalam-e-rind mein aksar haqiqat aa hi jati hai

husn ek chiz hai aisi tabi'at aa hi jati hai

hazaron masjiden hon jannaten hon 'arsh hon lekin

na ho pesh-e-nazar dilbar qiyamat aa hi jati hai

kai na-kaamiyan mahrumiyan ruswaiyan lekar

'umuman KHana-e-dil mein mohabbat aa hi jati hai

KHudi KHud-e'timadi mein badal jae to bandon ko

KHuda se sar-kashi karne ki naubat aa hi jati hai

zaban-e-’ishq gar samjhae farman-e-kHudawandi

to mai-KHane ki zad mein phir shari'at aa hi jati hai

faqir-e-‘qadri’ jo dekhte hain chashm-e-bina se

to bande ko KHuda kahne ki jurat aa hi jati hai