mariz-e-ishq pe kya kya teri jafa na hui

marīz-e-ishq pe kyā kyā tirī jafā na huī

vo kaun sā hai sitam jis kī intihā na huī

jahān-e-ishq meñ rusvā kabhī vafā na huī

mirī zabāñ kabhī shikvoñ se āshnā na huī

navā-e-dil kabhī tāsīr se judā na huī

dar-e-qubūl se vāpas merī duā na huī

milī bahisht to kyā jab vahī hijāb rahā

jazā-e-husn-e-amal zauq-e-āshnā na huī

vo aql kyā hai jo dīvāna-pan meñ kho na ga.ī

vo ruuh kyā jo tere ishq meñ fanā na huī

zabāñ par ye baḌā zulm hogā ai 'kāmil'

merī ġhazal pe agar aaj vāh-vā na hoī

mariz-e-ishq pe kya kya teri jafa na hui

wo kaun sa hai sitam jis ki intiha na hui

jahan-e-ishq mein ruswa kabhi wafa na hui

meri zaban kabhi shikwon se aashna na hui

nawa-e-dil kabhi tasir se juda na hui

dar-e-qubul se wapas meri dua na hui

mili bahisht to kya jab wahi hijab raha

jaza-e-husn-e-amal zauq-e-ashna na hui

wo aql kya hai jo diwana-pan mein kho na gai

wo ruh kya jo tere ishq mein fana na hui

zaban par ye baDa zulm hoga ai 'kaamil'

meri ghazal pe agar aaj wah-wa na hoi