مریض عشق پہ کیا کیا تری جفا نہ ہوئی

مریض عشق پہ کیا کیا تری جفا نہ ہوئی

وہ کون سا ہے ستم جس کی انتہا نہ ہوئی

جہان عشق میں رسوا کبھی وفا نہ ہوئی

مری زباں کبھی شکوؤں سے آشنا نہ ہوئی

نوائے دل کبھی تاثیر سے جدا نہ ہوئی

در قبول سے واپس میری دعا نہ ہوئی

ملی بہشت تو کیا جب وہی حجاب رہا

جزائے حسن عمل ذوق آشنا نہ ہوئی

وہ عقل کیا ہے جو دیوانہ پن میں کھو نہ گئی

وہ روح کیا جو تیرے عشق میں فنا نہ ہوئی

زباں پر یہ بڑا ظلم ہوگا اے کاملؔ

میری غزل پہ اگر آج واہ وا نہ ہوئی