luTe na kyun dil-e-kaunain ya gharib-nawaz

luTe na kyuuñ dil-e-kaunain yā ġharīb-navāz

ze-farq tā ba-qadam har adā ġharīb-navāz

merī nazar meñ hai rauza tirā ġharīb-navāz

nigāh-e-shauq hai qibla-numā ġharīb-navāz

tirā vajūd hai jān-e-bahār-e-gulshan-e-chisht

tujhī se nikhat-e-har-gul hai yā ġharīb-navāz

rasūl-e-haq kī atā aur tum a.tā-e-rasūl

jo tum mile to sabhī kuchh milā ġharīb-navāz

tumhāre dar se hazāroñ ġharīb palte haiñ

tumhāre kūche kī saarī fazā ġharīb-navāz

tumhārā dard hai sarmāya-e-hayāt mirā

ḳhudā kare ki ye ho lā-davā ġharīb-navāz

ba-haq-e-kHvāja-e-usmāñ idhar bhī chashm-e-karam

tumhāre dar kā huuñ maiñ bhī gadā ġharīb-navāz

samajh meñ aa.egā imdād kaise hotī hai

zarā taḌap ke pukāro to yā ġharīb-navāz

ziyā haiñ sha.m-e-risālat kī naam kuchh bhī sahī

mujhe to ek haiñ ġhausul-varā ġharīb-navāz

huzūr aap kā aisā bhī ik ġhulām sahī

panāh dījiye 'kāmil' ko yā ġharīb-navāz

luTe na kyun dil-e-kaunain ya gharib-nawaz

ze-farq ta ba-qadam har ada gharib-nawaz

meri nazar mein hai rauza tera gharib-nawaz

nigah-e-shauq hai qibla-numa gharib-nawaz

tera wajud hai jaan-e-bahaar-e-gulshan-e-chisht

tujhi se nikhat-e-har-gul hai ya gharib-nawaz

rasul-e-haq ki ata aur tum ata-e-rasul

jo tum mile to sabhi kuchh mila gharib-nawaz

tumhaare dar se hazaron gharib palte hain

tumhaare kuche ki sari faza gharib-nawaz

tumhaara dard hai sarmaya-e-hayat mera

KHuda kare ki ye ho la-dawa gharib-nawaz

ba-haq-e-kHwaja-e-usman idhar bhi chashm-e-karam

tumhaare dar ka hun main bhi gada gharib-nawaz

samajh mein aaega imdad kaise hoti hai

zara taDap ke pukaro to ya gharib-nawaz

ziya hain sham-e-risalat ki nam kuchh bhi sahi

mujhe to ek hain ghausul-wara gharib-nawaz

huzur aap ka aisa bhi ek ghulam sahi

panah dijiye 'kaamil' ko ya gharib-nawaz