hum jo kisi ke ho gae hum jo kisi par mar gae

ham jo kisī ke ho ga.e ham jo kisī par mar ga.e

apnī tamām umr meñ kaam yahī to kar ga.e

dil ke nasīb jaag uThe tār-e-nazar sañvar ga.e

aap jahāñ-jahāñ rahe aap jidhar jidhar ga.e

husn ko jin pe naaz thā jab se vo dīda-var ga.e

kitne hī chehre phuul se zard paḌe utar ga.e

jab na ho koī qadr-dāñ fasl-e-bahār bhī ḳhizāñ

ġhunche chaTak ke rah ga.e phuul khile bikhar ga.e

DhūñDh rahī hai bār-bār un kī nigāh-e-sogvār

ahl-e-vafā vo kyā hue ahl-e-nazar kidhar ga.e

husn vahī adā vahī jalva vahī fazā vahī

kis se nazar kī daad luuñ haaye vo ham-nazar ga.e

ik dar-e-yār ke sivā kuchh na kahīñ sukūñ milā

jaane kahāñ kahāñ phire jaane kidhar kidhar ga.e

apnī to maut aur hayāt un kī bas ik nazar kī baat

ek nazar meñ jī uThe ek nazar meñ mar ga.e

'kāmil' usī pe chhoḌ de dast-e-duā ko toḌ de

sabr se ab bhī kaam le naale to be-asar ga.e

hum jo kisi ke ho gae hum jo kisi par mar gae

apni tamam umr mein kaam yahi to kar gae

dil ke nasib jag uThe tar-e-nazar sanwar gae

aap jahan-jahan rahe aap jidhar jidhar gae

husn ko jin pe naz tha jab se wo dida-war gae

kitne hi chehre phul se zard paDe utar gae

jab na ho koi qadr-dan fasl-e-bahaar bhi KHizan

ghunche chaTak ke rah gae phul khile bikhar gae

DhunDh rahi hai bar-bar un ki nigah-e-sogwar

ahl-e-wafa wo kya hue ahl-e-nazar kidhar gae

husn wahi ada wahi jalwa wahi faza wahi

kis se nazar ki dad lun haye wo ham-nazar gae

ek dar-e-yar ke siwa kuchh na kahin sukun mila

jaane kahan kahan phire jaane kidhar kidhar gae

apni to maut aur hayat un ki bas ek nazar ki baat

ek nazar mein ji uThe ek nazar mein mar gae

'kaamil' usi pe chhoD de dast-e-dua ko toD de

sabr se ab bhi kaam le nale to be-asar gae