dil mein dhaDkan hai na aankhon mein nazar baqi hai

dil meñ dhaḌkan hai na āñkhoñ meñ nazar baaqī hai

phir bhī sab kuchh hai ġham-e-yār agar baaqī hai

aur kuchh luuT le uftād-e-mohabbat ke maze

kuchh tamāshā jo abhī sho.abda-gar baaqī hai

ham kisī aur kī dahlīz pe sar kyuuñ phoḌeñ

sar-e-saudā-zada baaqī tirā dar baaqī hai

quvvat-e-’ishq pe takiya bhī hai tauhīn-e-niyāz

kyuuñ abhī tak mirī aahoñ meñ asar baaqī hai

jitne dar band haiñ allāh kare band raheñ

tere bandoñ ke liye jab tirā dar baaqī hai

aur kuchh haqq-e-junūñ hai to adā kar deñge

ek bhī taar garebāñ meñ agar baaqī hai

pastī-e-aqal hai tārīki-e-qismat kā savāl

shab ye kahtī hai ki hañgām-e-sahar baaqī hai

aib ko aib samajhnā to na.ī baat nahīñ

aib ye bhī hai ki ehsās-e-hunar baaqī hai

beḌiyāñ kaT ga.iiñ har pā-e-nigah kī 'kāmil'

ab to be-qaid bas ik zauq-e-nazar baaqī hai

dil mein dhaDkan hai na aankhon mein nazar baqi hai

phir bhi sab kuchh hai gham-e-yar agar baqi hai

aur kuchh luT le uftad-e-mohabbat ke maze

kuchh tamasha jo abhi shoabda-gar baqi hai

hum kisi aur ki dahliz pe sar kyun phoDen

sar-e-sauda-zada baqi tera dar baqi hai

quwwat-e-’ishq pe takiya bhi hai tauhin-e-niyaz

kyun abhi tak meri aahon mein asar baqi hai

jitne dar band hain allah kare band rahen

tere bandon ke liye jab tera dar baqi hai

aur kuchh haqq-e-junun hai to ada kar denge

ek bhi tar gareban mein agar baqi hai

pasti-e-aqal hai tariki-e-qismat ka sawal

shab ye kahti hai ki hangam-e-sahar baqi hai

aib ko aib samajhna to nai baat nahin

aib ye bhi hai ki ehsas-e-hunar baqi hai

beDiyan kaT gain har pa-e-nigah ki 'kaamil'

ab to be-qaid bas ek zauq-e-nazar baqi hai