kyun munh takun na dida-e-hairat se chah ka

kyuuñ muñh takūñ na dīda-e-hairat se chaah kā

ā.īna rū-e-yār banā hai nigāh kā

jab aap hī ko paas nahīñ rasm-o-rāh kā

kyā fā.eda jo ho bhī irāda nibāh kā

soz-e-darūñ se jal ke hai surma jo merī ḳhaak

aañkh un butoñ kī mujh ko hai gosha panāh kā

yuuñ be-hijāb baam pe aayā na kījiye

qaabū meñ dil rahegā na ik ahl-e-rāh kā

taklīf dast-o-taiġh uThāne se fā.eda

kaafī hai mere qatl ko ḳhanjar nigāh kā

yuuñ justujū-e-yār meñ hai be-qarār dil

bhūlā huā phire koī jis tarah raah kā

begāna ban ke pūchhte haiñ haal 'rahmatī'

tā jis meñ ho irāda na zāhir nibāh kā

kyun munh takun na dida-e-hairat se chah ka

aaina ru-e-yar bana hai nigah ka

jab aap hi ko pas nahin rasm-o-rah ka

kya faeda jo ho bhi irada nibah ka

soz-e-darun se jal ke hai surma jo meri KHak

aankh un buton ki mujh ko hai gosha panah ka

yun be-hijab baam pe aaya na kijiye

qabu mein dil rahega na ek ahl-e-rah ka

taklif dast-o-taigh uThane se faeda

kafi hai mere qatl ko KHanjar nigah ka

yun justuju-e-yar mein hai be-qarar dil

bhula hua phire koi jis tarah rah ka

begana ban ke puchhte hain haal 'rahmati'

ta jis mein ho irada na zahir nibah ka