kar ke KHarab ishq ko kya koi kaam aur hai

kar ke ḳharāb 'ishq ko kyā koī kaam aur hai

baa'd nigāh-e-mast ke laġhzish-e-gām aur hai

hashr-o-bahisht meñ bhī ḳhair vaqfa-e-chand aah aur

varna abhī to 'ishq ko zauq-e-ḳhirām aur hai

nāz-o-niyāz se alag hijr-o-visāl se buland

un kī harīm-e-ḳhās meñ merā maqām aur hai

qahr na kar tamām abhī baat hai nā-tamām abhī

baa'd salām-e-shauq ke 'uzr-e-salām aur hai

ai ki tirī nigāh ne dil ko mire kiyā ḳharāb

aa ki dil-e-ḳharāb meñ ik tirā naam aur hai

khoiye mudda'ā kahāñ pā.iye mudda'ā kahāñ

shān-e-nigāh aur hai tarz-e-kalām aur hai

zāhid-e-pāk-bāz huuñ 'maikash'-e-mai-navāz huuñ

'ishq ke har maqām meñ merā payām aur hai

kar ke KHarab 'ishq ko kya koi kaam aur hai

ba'd nigah-e-mast ke laghzish-e-gam aur hai

hashr-o-bahisht mein bhi KHair waqfa-e-chand aah aur

warna abhi to 'ishq ko zauq-e-KHiram aur hai

naz-o-niyaz se alag hijr-o-visal se buland

un ki harim-e-KHas mein mera maqam aur hai

qahr na kar tamam abhi baat hai na-tamam abhi

ba'd salam-e-shauq ke 'uzr-e-salam aur hai

ai ki teri nigah ne dil ko mere kiya KHarab

aa ki dil-e-KHarab mein ek tera nam aur hai

khoiye mudda'a kahan paiye mudda'a kahan

shan-e-nigah aur hai tarz-e-kalam aur hai

zahid-e-pak-baz hun 'maikash'-e-mai-nawaz hun

'ishq ke har maqam mein mera payam aur hai