کر کے خراب عشق کو کیا کوئی کام اور ہے

کر کے خراب عشق کو کیا کوئی کام اور ہے

بعد نگاہ مست کے لغزش گام اور ہے

حشر و بہشت میں بھی خیر وقفہ چند آہ اور

ورنہ ابھی تو عشق کو ذوق خرام اور ہے

ناز و نیاز سے الگ ہجر و وصال سے بلند

ان کی حریم خاص میں میرا مقام اور ہے

قہر نہ کر تمام ابھی بات ہے نا تمام ابھی

بعد سلام شوق کے عذر سلام اور ہے

اے کہ تری نگاہ نے دل کو مرے کیا خراب

آ کہ دل خراب میں اک ترا نام اور ہے

کھوئیے مدعا کہاں پائیے مدعا کہاں

شان نگاہ اور ہے طرز کلام اور ہے

زاہد پاک باز ہوں میکشؔ مے نواز ہوں

عشق کے ہر مقام میں میرا پیام اور ہے