kaun kis ka hai kis ko ulfat hai

kaun kis kā hai kis ko ulfat hai

apne matlab kī saarī ḳhilqat hai

koī allāh mujh ko ye to batā.e

un se milne kī koī sūrat hai

ham-damoñ kyā kahūñ meñ haal apnā

kuchh na pūchho jo merī hālat hai

zarre zarre meñ mehr kā jalva

dekhe jo sāhab-e-basīrat hai

vo karam to kareñge kyā mujh par

yaad rakheñ yahī ġhanīmat hai

hai yahī kārḳhānā-e-ālam

kahīñ ġham hai kahīñ masarrat hai

qaid-e-duniyā se ham hue jo rihā

ai ajal ye tirī badaulat hai

hashr meñ vo manā rahe haiñ mujhe

ii.d se baḌh kar ye qayāmat hai

dil to ab ham lagā chuke 'nayyar'

aage allāh kī mashiyyat hai

kaun kis ka hai kis ko ulfat hai

apne matlab ki sari KHilqat hai

koi allah mujh ko ye to batae

un se milne ki koi surat hai

ham-damon kya kahun mein haal apna

kuchh na puchho jo meri haalat hai

zarre zarre mein mehr ka jalwa

dekhe jo sahab-e-basirat hai

wo karam to karenge kya mujh par

yaad rakhen yahi ghanimat hai

hai yahi karKHana-e-alam

kahin gham hai kahin masarrat hai

qaid-e-duniya se hum hue jo riha

ai ajal ye teri badaulat hai

hashr mein wo mana rahe hain mujhe

id se baDh kar ye qayamat hai

dil to ab hum laga chuke 'nayyar'

aage allah ki mashiyyat hai