کون کس کا ہے کس کو الفت ہے

کون کس کا ہے کس کو الفت ہے

اپنے مطلب کی ساری خلقت ہے

کوئی اللہ مجھ کو یہ تو بتائے

ان سے ملنے کی کوئی صورت ہے

ہمدموں کیا کہوں میں حال اپنا

کچھ نہ پوچھو جو میری حالت ہے

ذرے ذرے میں مہر کا جلوہ

دیکھے جو صاحب بصیرت ہے

وہ کرم تو کریں گے کیا مجھ پر

یاد رکھیں یہی غنیمت ہے

ہے یہی کارخانۂ عالم

کہیں غم ہے کہیں مسرت ہے

قید دنیا سے ہم ہوئے جو رہا

اے اجل یہ تری بدولت ہے

حشر میں وہ منا رہے ہیں مجھے

عید سے بڑھ کر یہ قیامت ہے

دل تو اب ہم لگا چکے نیرؔ

آگے اللہ کی مشیت ہے