mujassam surat-e-gham hun sarapa hasrat-e-dil hun

mujassam sūrat-e-ġham huuñ sarāpā hasrat-e-dil huuñ

na maiñ zindoñ meñ dāḳhil huuñ na maiñ mardoñ meñ shāmil huuñ

adā-o-nāz-e-qātil huuñ kabhī andāz-e-bismil huuñ

kahīñ maiñ ḳhanda-e-gul huuñ kahīñ soz-e-anādil huuñ

mujhe taḌpā rahī hai yād-e-teġh-e-abrū-e-qātil

saf-e-maqtal meñ goyā meñ javāb-e-murġh-e-bismil huuñ

ḳhayāl-e-mah-jabīnāñ bhuul kar dil meñ nahīñ aatā

jahāñ par qāfile luTte haiñ vo vīrān manzil huuñ

vahāñ nāz-o-nazākat hai yahāñ zo.af-e-naqāhat hai

na vo aane ke laa.eq haiñ na maiñ jaane ke qābil huuñ

ilāj-e-bad-gumānī hai mire imkān se bāhire

bigaḌte kyuuñ ho maiñ ne kab kahā hūroñ pe maa.il huuñ

unheñ dil kyā diyā goyā balā.eñ mol liiñ maiñ ne

satā.eñ dil dukhā.eñ maiñ jafāoñ hī ke qābil huuñ

ḳhudā ke sāmne ban-Than ke jab vo be-naqāb aayā

dil-e-betāb bol uThā us kāfir pe maa.il huuñ

mujhe kyuuñ pīste haiñ gardish-e-aflāk ai 'kausar'

na maiñ lohā na patthar huuñ magar hasrat-zada dil huuñ

mubārak zāhidoñ ko phir bāġh-e-ḳhuld 'kausar'

na jannat mere qābil hai na maiñ jannat ke qābil huuñ

mujassam surat-e-gham hun sarapa hasrat-e-dil hun

na main zindon mein daKHil hun na main mardon mein shamil hun

ada-o-naz-e-qatil hun kabhi andaz-e-bismil hun

kahin main KHanda-e-gul hun kahin soz-e-anadil hun

mujhe taDpa rahi hai yaad-e-tegh-e-abru-e-qatil

saf-e-maqtal mein goya mein jawab-e-murgh-e-bismil hun

KHayal-e-mah-jabinan bhul kar dil mein nahin aata

jahan par qafile luTte hain wo viran manzil hun

wahan naz-o-nazakat hai yahan zoaf-e-naqahat hai

na wo aane ke laeq hain na main jaane ke qabil hun

ilaj-e-bad-gumani hai mere imkan se bahire

bigaDte kyun ho main ne kab kaha huron pe mail hun

unhen dil kya diya goya balaen mol lin main ne

sataen dil dukhaen main jafaon hi ke qabil hun

KHuda ke samne ban-Than ke jab wo be-naqab aaya

dil-e-betab bol uTha us kafir pe mail hun

mujhe kyun piste hain gardish-e-aflak ai 'kausar'

na main loha na patthar hun magar hasrat-zada dil hun

mubarak zahidon ko phir bagh-e-KHuld 'kausar'

na jannat mere qabil hai na main jannat ke qabil hun