hue dost dushman mere ai jaan teri furqat mein

hue dost dushman mere ai jaañ terī furqat meñ

misl sach hai nahīñ apnā koī hotā musībat meñ

ḳhushī se paañv phailāte haiñ kyā kyā kunj-e-turbat meñ

ajab lazzat hai tire haath se qātil shahādat meñ

husūl-e-vasl nā-mumkin tamannā.eñ merī behad

ilāhī kis tarah niklegā dam is yās-o-hasrat

nikaltī hai sadā.eñ marhabā har zaḳhm se qātil

hameñ lazzat milī kyā jaane kyā shauq-e-shahādat meñ

merā dāman yakāyak bhar gayā la.al-e-badaḳhshāñ se

lab-e-rañgīñ jo yaad aa.e kisī kī josh-e-riqqat meñ

kalām-e-yār se nisbat nahīñ taqrīr-e-īsā ko

latāfat meñ talāqat meñ fasāhat meñ balāġhat meñ

ḳhudā se Dar zarā 'kausar' ki tū to kho.e baiThā hai

sarāpā dīn-o-īmān ik but-e-kāfir kī chāhat meñ

ba-zāhir haiñ judā go āshiq-o-māshūq ai 'kausar'

nahīñ hai etibārī farq bhī lekin haqīqat meñ

hue dost dushman mere ai jaan teri furqat mein

misl sach hai nahin apna koi hota musibat mein

KHushi se panw phailate hain kya kya kunj-e-turbat mein

ajab lazzat hai tere hath se qatil shahadat mein

husul-e-wasl na-mumkin tamannaen meri behad

ilahi kis tarah niklega dam is yas-o-hasrat

nikalti hai sadaen marhaba har zaKHm se qatil

hamein lazzat mili kya jaane kya shauq-e-shahadat mein

mera daman yakayak bhar gaya lal-e-badaKHshan se

lab-e-rangin jo yaad aae kisi ki josh-e-riqqat mein

kalam-e-yar se nisbat nahin taqrir-e-isa ko

latafat mein talaqat mein fasahat mein balaghat mein

KHuda se Dar zara 'kausar' ki tu to khoe baiTha hai

sarapa din-o-iman ek but-e-kafir ki chahat mein

ba-zahir hain juda go aashiq-o-mashuq ai 'kausar'

nahin hai etibari farq bhi lekin haqiqat mein