jafa-o-jaur ke sadqe tasadduq-bar-zabani par

jafā-o-jaur ke sadqe tasadduq-bar-zabānī par

sunāte haiñ vo lākhoñ be-nuqat is be-dahānī par

ḳhudā rā rahm kar jallād lab tishna-dhānī par

shifā bīmār-e-ġham kī uTh rahī hai ḳhanjar ke paanī par

vo dast-e-nāzuk se agar zahr-e-halāhal deñ

tasadduq hoñ janāb-e-ḳhizr marg-e-nā-gahānī par

ġhurūr-e-husn un ko do-qadam chalne nahīñ detā

nazākat phaT paḌī nām-e-ḳhudā uThtī javānī par

talāsh-e-āb-e-haivāñ meñ hazāroñ Thokareñ khā.īñ

ḳhizr kyuuñ jaan dete haiñ hayāt-e-jāvedānī par

na pahuñchā kūcha-e-dildār meñ musht-e-ġhubār apnā

sabā ko bhī na rahm aayā hamārī nā-tavānī par

jo azm-e-qatl hai āñkhoñ pe paTTī bāñdh lī qātil

mabādā tujh ko rahm aa jaa.e merī nā-tavānī par

paḌe jab vaar ochhe muskurā.e zaḳhm bismil ke

udhar teġh-e-dūdam ne daañt piise saḳht-jānī par

bahār-e-ḳhuld sadqe hai tan-e-pur-dāġh par 'kausar'

gul-e-firdaus kā dhokā hai chhalloñ kī nishānī par

jafa-o-jaur ke sadqe tasadduq-bar-zabani par

sunate hain wo lakhon be-nuqat is be-dahani par

KHuda ra rahm kar jallad lab tishna-dhani par

shifa bimar-e-gham ki uTh rahi hai KHanjar ke pani par

wo dast-e-nazuk se agar zahr-e-halahal den

tasadduq hon janab-e-KHizr marg-e-na-gahani par

ghurur-e-husn un ko do-qadam chalne nahin deta

nazakat phaT paDi nam-e-KHuda uThti jawani par

talash-e-ab-e-haiwan mein hazaron Thokaren khain

KHizr kyun jaan dete hain hayat-e-jawedani par

na pahuncha kucha-e-dildar mein musht-e-ghubar apna

saba ko bhi na rahm aaya hamari na-tawani par

jo azm-e-qatl hai aankhon pe paTTi bandh li qatil

mabaada tujh ko rahm aa jae meri na-tawani par

paDe jab war ochhe muskurae zaKHm bismil ke

udhar tegh-e-dudam ne dant pise saKHt-jaani par

bahaar-e-KHuld sadqe hai tan-e-pur-dagh par 'kausar'

gul-e-firdaus ka dhoka hai chhallon ki nishani par