koi kahta hai saudai koi kahta hai diwana

koī kahtā hai saudā.ī koī kahtā hai dīvāna

mohabbat meñ tumhārī ho ga.e ham sab se begāna

tumhāre dar pe sar rakhnā hamārī ye 'ibādat hai

yahī kā'ba yahī masjid yahī hai dair-o-but-ḳhāna

marīz 'ishq huuñ yaaro mirī sehhat nahīñ mumkin

'ilāj-e-dard-mañd-e-'ishq hai dīdār-e-jānāna

yahāñ maiñ ne sunā kuchh aur hai tum kyā sunāte ho

tumhārī vā'z-goī ko samajhtā huuñ maiñ afsāna

shah-e-ḳhādim kī qudrat ko zarā dekho 'ḳhalīl' ahmad

pinhāyā faqar kā jaama banāyā tarz-e-shāhāna

koi kahta hai saudai koi kahta hai diwana

mohabbat mein tumhaari ho gae hum sab se begana

tumhaare dar pe sar rakhna hamari ye 'ibaadat hai

yahi ka'ba yahi masjid yahi hai dair-o-but-KHana

mariz 'ishq hun yaro meri sehhat nahin mumkin

'ilaj-e-dard-mand-e-'ishq hai didar-e-jaanana

yahan main ne suna kuchh aur hai tum kya sunate ho

tumhaari wa'z-goi ko samajhta hun main afsana

shah-e-KHadim ki qudrat ko zara dekho 'KHalil' ahmad

pinhaya faqar ka jama banaya tarz-e-shahana