KHayal-e-shab-e-gham se ghabra rahe hain

ḳhayāl-e-shab-e-ġham se ghabrā rahe haiñ

hameñ din ko taare nazar aa rahe haiñ

vo kuchh ġhair se va.ada farmā rahe haiñ

mare sar kī jhūTī qasam khā rahe haiñ

ye haiñ shoḳhiyāñ apnī tasvīr de kar

shab-e-va.ada vo ham ko bahlā rahe haiñ

na uftād kuchh pesh aa.e ilāhī

zarā ham chaman kī havā khā rahe haiñ

uThā.eñ na fitna ye mahshar meñ koī

hasīñ be-chhue-chheḌe jhuñjhlā rahe haiñ

dam-e-va.az kaise maze meñ haiñ vaa.iz

bhare jaam kausar ke chhalkā rahe haiñ

ye insān ban jaa.eñ kuchh saath rah kar

farishtoñ ko ham raah par lā rahe haiñ

na luuñ rāh-e-mai-ḳhāna kis tarh vaa.iz

ye bādal jo sar par mare chhā rahe haiñ

chuneñge vo afshāñ sar-e-bām kab tak

shab-e-va.ada kyuuñ taare ginvā rahe haiñ

gale gal mileñge vo mīnā-e-mai se

jo piite hue aaj sharmā rahe haiñ

lagā do zarā haath apnī galī meñ

janāza liye dil kā ham jā rahe haiñ

ye uljhe haiñ rindoñ se kiyā shaiḳh sāhib

buḌhāpe meñ kyuuñ DāḌhī rañvā rahe haiñ

qayāmat bichhī jaatī hai har qadam par

ye kaun aa rahā hai vahī aa rahe haiñ

duā de rahā huuñ ye dīvāngī meñ

chuneñ phuul tinke jo chunvā rahe haiñ

kamar sīdhī karne zarā mai-kade meñ

asā Tekte kyā 'riyāz' aa he haiñ

KHayal-e-shab-e-gham se ghabra rahe hain

hamein din ko tare nazar aa rahe hain

wo kuchh ghair se wada farma rahe hain

mare sar ki jhuTi qasam kha rahe hain

ye hain shoKHiyan apni taswir de kar

shab-e-wada wo hum ko bahla rahe hain

na uftad kuchh pesh aae ilahi

zara hum chaman ki hawa kha rahe hain

uThaen na fitna ye mahshar mein koi

hasin be-chhue-chheDe jhunjhla rahe hain

dam-e-waz kaise maze mein hain waiz

bhare jam kausar ke chhalka rahe hain

ye insan ban jaen kuchh sath rah kar

farishton ko hum rah par la rahe hain

na lun rah-e-mai-KHana kis tarh waiz

ye baadal jo sar par mare chha rahe hain

chunenge wo afshan sar-e-baam kab tak

shab-e-wada kyun tare ginwa rahe hain

gale gal milenge wo mina-e-mai se

jo pite hue aaj sharma rahe hain

laga do zara hath apni gali mein

janaza liye dil ka hum ja rahe hain

ye uljhe hain rindon se kiya shaiKH sahib

buDhape mein kyun DaDhi ranwa rahe hain

qayamat bichhi jati hai har qadam par

ye kaun aa raha hai wahi aa rahe hain

dua de raha hun ye diwangi mein

chunen phul tinke jo chunwa rahe hain

kamar sidhi karne zara mai-kade mein

asa Tekte kya 'riyaz' aa he hain