KHirad ko ahl-e-junun zer-e-dam karne lage

ḳhirad ko ahl-e-junūñ zer-e-dām karne lage

amīr-e-shahr kī nīndeñ harām karne lage

panāh māñgeñ na kyuuñ us se tīr-o-nashtar bhī

koī zabāñ se agar qatl-e-ām karne lage

jo yaad aaga.ī ham ko rasūl kī sīrat

to dushmanoñ ko bhī baḌh kar salām karne lage

ye ibtidā to nahīñ merī āzmā.ish kī

bahut se log mirā ehtirām karne lage

jo samjhe jaate the bāzār ke baḌe tājir

vo dūsroñ kī dukānoñ meñ kaam karne lage

tire darīche meñ sūraj kī sub.h hone lagī

tirī galī meñ sitāre bhī shaam karne lage

zamīñ kā qaht hai shahroñ meñ is liye 'akbar'

nigāh-e-yār meñ ab ham qiyām karne lage

KHirad ko ahl-e-junun zer-e-dam karne lage

amīr-e-shahr ki ninden haram karne lage

panah mangen na kyun us se tir-o-nashtar bhi

koi zaban se agar qatl-e-am karne lage

jo yaad aagai hum ko rasul ki sirat

to dushmanon ko bhi baDh kar salam karne lage

ye ibtida to nahin meri aazmaish ki

bahut se log mera ehtiram karne lage

jo samjhe jate the bazar ke baDe tajir

wo dusron ki dukanon mein kaam karne lage

tere dariche mein suraj ki subh hone lagi

teri gali mein sitare bhi sham karne lage

zamin ka qaht hai shahron mein is liye 'akbar'

nigah-e-yar mein ab hum qiyam karne lage