jaan se jaun main dard itna baDhate bhi nahin

jaan se jā.ūñ maiñ dard itnā baḌhāte bhī nahīñ

dārū-e-dard jo pūchhūñ to batāte bhī nahīñ

kyā se kyā ho ga.ī sūrat unheñ ma.alūm bhī nahīñ

chāra-gar haiñ ki lagī dil kī bujhāte bhī nahīñ

merī bar-gashta nasībī kā burā ho yārab

kashish-e-ishq bhī hai aur vo aate bhī nahīñ

sādgī se jo na leñ phuul samajh kar un ko

gul-e-dāġh-e-jigar aisoñ ko dikhāte bhī nahii.

hañs ke vo pūchhte bhī haiñ mere rone kā sabab

aur burqā ruḳh-e-raushan se uThāte bhī nahīñ

zabt meñ jaan kā Dar aah meñ rusvā.ī kā

ab to kahte bhī nahīñ bantī chhupāte bhī nahīñ

in kī harjā.ī bhī mash.hūr zamāne meñ hai

aur naqsh-e-qadam un kā kahīñ paate bhī nahīñ

kyā ḳhabar thī ki vo but dushman-e-īmāñ hogā

aise kāfir se kahīñ dil to lagāte bhī nahīñ

kabhī ḳhāmosh bhī haiñ 'ḳhizar' kabhī nālāñ bhī

aur dil par jo guzartī hai batāte bhī nahīñ

jaan se jaun main dard itna baDhate bhi nahin

daru-e-dard jo puchhun to batate bhi nahin

kya se kya ho gai surat unhen malum bhi nahin

chaara-gar hain ki lagi dil ki bujhate bhi nahin

meri bar-gashta nasibi ka bura ho yarab

kashish-e-ishq bhi hai aur wo aate bhi nahin

sadgi se jo na len phul samajh kar un ko

gul-e-dagh-e-jigar aison ko dikhate bhi nahi

hans ke wo puchhte bhi hain mere rone ka sabab

aur burqa ruKH-e-raushan se uThate bhi nahin

zabt mein jaan ka Dar aah mein ruswai ka

ab to kahte bhi nahin banti chhupate bhi nahin

in ki harjai bhi mashhur zamane mein hai

aur naqsh-e-qadam un ka kahin pate bhi nahin

kya KHabar thi ki wo but dushman-e-iman hoga

aise kafir se kahin dil to lagate bhi nahin

kabhi KHamosh bhi hain 'KHizar' kabhi nalan bhi

aur dil par jo guzarti hai batate bhi nahin