KHuda jaane dil ko mere kya hua hai

ḳhudā jaane dil ko mire kyā huā hai

tumhīñ se ḳhafā hai tumhīñ par fidā hai

maiñ ḳhud mā’nī-e-husn huuñ ai sitam-gar

magar kuchh judā.ī meñ terī mazā hai

mirā dil hai markaz tumhāre sitam kā

kisī par kiyā tum ne mujh par huā hai

maiñ is daur-e-hastī meñ vo dā.ira huuñ

ki har intihā par mirī ibtidā hai

na kuchh kah sakā maiñ na samjhe vahī kuchh

bahut der sochā ki kyā mudda'ā hai

mujhe apne hone ke haiñ laakh shikve

kyā tum se shikvā ye apnā gilā hai

hai mardūd-e-dair aur kā'be se fāriġh

na momin na kāfir ye dil kyā balā hai

maiñ har falsafe kī haqīqat huuñ 'maikash'

maiñ jis meñ nahīñ falsafa hī vo kyā hai

KHuda jaane dil ko mere kya hua hai

tumhin se KHafa hai tumhin par fida hai

main KHud ma’ni-e-husn hun ai sitam-gar

magar kuchh judai mein teri maza hai

mera dil hai markaz tumhaare sitam ka

kisi par kiya tum ne mujh par hua hai

main is daur-e-hasti mein wo daira hun

ki har intiha par meri ibtida hai

na kuchh kah saka main na samjhe wahi kuchh

bahut der socha ki kya mudda'a hai

mujhe apne hone ke hain lakh shikwe

kya tum se shikwa ye apna gila hai

hai mardud-e-dair aur ka'be se farigh

na momin na kafir ye dil kya bala hai

main har falsafe ki haqiqat hun 'maikash'

main jis mein nahin falsafa hi wo kya hai