خوشی سے دور ہوں نا آشنائے بزم عشرت ہوں

خوشی سے دور ہوں نا آشنائے بزم عشرت ہوں

سراپا درد ہوں وابستۂ زنجیر قسمت ہوں

حقیقت میں کوئی واقف نہیں میری حقیقت سے

معمہ ہوں کسی کا راز ہوں یا سر قدرت ہوں

کوئی سمجھے تو کیا سمجھے کوئی جانے تو کیا جانے

کسی کا عکس ہوں آئینہ دار بزم حیرت ہوں

گلستاں کی چمن آرائیوں سے مجھ کو کیا مطلب

کہ پابند قفس ہوں مبتلائے درد الفت ہوں

وہ دل ہوں وہ زباں ہوں جن میں گویائی نہیں گویا

مری ترکیب کہتی ہے کہ تصویر محبت ہوں

غضب کی چال گلشن میں چلا ہے باغباں محسنؔ

اسی کا یہ نتیجہ ہے کہ پامال صعوبت ہوں