KHubi-e-chashm-e-pir ko mera salam hai

ḳhūbī-e-chashm-e-pīr ko merā salām hai

un ke sivā sharāb kā piinā harām hai

nazroñ kī shoḳhiyoñ se hī maḳhmūr shaam hai

be-shak ye mai-kada tirī āñkhoñ kā naam hai

lo aa gayā hai bazm meñ gardish kā vaqt bhī

pesh-e-nigāh-e-riñd ab un kā imaam hai

mil ne lagā hai pīr-e-muġhān-e-jahāñ se jaam

tab hī to mai-kade meñ ajī dhuum dhaam hai

uftād dām-e-nafs huuñ mujh ko bachā.iye

dast-e-karam meñ aap ke merī lagām hai

kis vāste ko ġhair kī jānib uThe nazar

merī talab ko bas dar-e-jānāñ se kaam hai

qadmoñ ko mere baḳhsh de kho.e sabāt tū

terī nazar kā do-jahāñ meñ faiz-e-’ām hai

rindoñ ke biich meñ bhī mirā naam ho gayā

saaqī kā jab se lutf mire gaam gaam hai

roz-e-alast terā giraftār meñ huā

zulfoñ kā daam hai tirī zulfoñ kā daam hai

ab har nafs 'asar' ko tirī aarzū rahe

us ko pilā de sāqiyā ye tishna kaam hai

KHubi-e-chashm-e-pir ko mera salam hai

un ke siwa sharab ka pina haram hai

nazron ki shoKHiyon se hi maKHmur sham hai

be-shak ye mai-kada teri aankhon ka nam hai

lo aa gaya hai bazm mein gardish ka waqt bhi

pesh-e-nigah-e-rind ab un ka imam hai

mil ne laga hai pir-e-mughan-e-jahan se jam

tab hi to mai-kade mein aji dhum dham hai

uftad dam-e-nafs hun mujh ko bachaiye

dast-e-karam mein aap ke meri lagam hai

kis waste ko ghair ki jaanib uThe nazar

meri talab ko bas dar-e-jaanan se kaam hai

qadmon ko mere baKHsh de khoe sabaat tu

teri nazar ka do-jahan mein faiz-e-’am hai

rindon ke bich mein bhi mera nam ho gaya

saqi ka jab se lutf mere gam gam hai

roz-e-alast tera giraftar mein hua

zulfon ka dam hai teri zulfon ka dam hai

ab har nafs 'asar' ko teri aarzu rahe

us ko pila de saqiya ye tishna kaam hai