na ghabrana dil-e-mahjur tariki se turbat ki

na ghabrānā dil-e-mahjūr tārīkī se turbat kī

are nādāñ haqīqat meñ vahī hai raat vaslat kī

bujhā dī sham-e-sarsar ne jo mujh be-kas ke turbat kī

ye shoḳhī to na thī us ātishīñ-rū kī sharārat kī

kabhī naala zabāñ par hai kabhī āh-o-fuġhāñ lab par

ilāhī ḳhair karnā us dil-e-bīmār ulfat kī

yahī kah kah ke ye pīr-e-falak barbād karatā hai

nishānī kyuuñ rahe baaqī kisī bekas kī turbat kī

laboñ tak ā-ga.ī hai jaan tum kaise masīhā ho

ḳhabar lete nahīñ allāh bīmār-e-mohabbat kī

guzar terā huā hai aaj shāyad us ke kūcha meñ

sabā ḳhushbū nahīñ be-vaj.h gulhā-e-musarrat kī

kareñ ābād vo ghar ġhair kā har rose jā jā kar

yahāñ tak haaye pahūñchī ab ḳharābī merī qismat kī

agar de koī dil apnā to ḳhud sar kaaT kar rakh de

ye hai qānūn-e-ulfat meñ sazā jurm-e-mohabbat kī

butoñ se dil lagā ke ab to ye hālat huī 'āsif'

ki ġhash aatā hai mujh ko dekh kar sūrat mohabbat kī

na ghabrana dil-e-mahjur tariki se turbat ki

are nadan haqiqat mein wahi hai raat waslat ki

bujha di sham-e-sarsar ne jo mujh be-kas ke turbat ki

ye shoKHi to na thi us aatishin-ru ki shararat ki

kabhi nala zaban par hai kabhi aah-o-fughan lab par

ilahi KHair karna us dil-e-bimar ulfat ki

yahi kah kah ke ye pir-e-falak barbaad karata hai

nishani kyun rahe baqi kisi bekas ki turbat ki

labon tak aa-gai hai jaan tum kaise masiha ho

KHabar lete nahin allah bimar-e-mohabbat ki

guzar tera hua hai aaj shayad us ke kucha mein

saba KHushbu nahin be-wajh gulha-e-musarrat ki

karen aabaad wo ghar ghair ka har rose ja ja kar

yahan tak haye pahunchi ab KHarabi meri qismat ki

agar de koi dil apna to KHud sar kaT kar rakh de

ye hai qanun-e-ulfat mein saza jurm-e-mohabbat ki

buton se dil laga ke ab to ye haalat hui 'asif'

ki ghash aata hai mujh ko dekh kar surat mohabbat ki