نہ گھبرانا دل مہجور تاریکی سے تربت کی

نہ گھبرانا دل مہجور تاریکی سے تربت کی

ارے ناداں حقیقت میں وہی ہے رات وصلت کی

بجھا دی شمع صرصر نے جو مجھ بے کس کے تربت کی

یہ شوخی تو نہ تھی اس آتشیں رو کی شرارت کی

کبھی نالہ زباں پر ہے کبھی آہ و فغاں لب پر

الٰہی خیر کرنا اس دل بیمار الفت کی

یہی کہہ کہہ کے یہ پیر فلک برباد کرتا ہے

نشانی کیوں رہے باقی کسی بیکس کی تربت کی

لبوں تک آ گئی ہے جان تم کیسے مسیحا ہو

خبر لیتے نہیں اللہ بیمار محبت کی

گزر تیرا ہوا ہے آج شاید اس کے کوچہ میں

صبا خوشبو نہیں بے وجہ گلہائے مسرت کی

کریں آباد وہ گھر غیر کا ہر روز جا جا کر

یہاں تک ہائے پہونچی اب خرابی میری قسمت کی

اگر دے کوئی دل اپنا تو خود سر کاٹ کر رکھ دے

یہ ہے قانون الفت میں سزا جرم محبت کی

بتوں سے دل لگا کے اب تو یہ حالت ہوئی آصفؔ

کہ غش آتا ہے مجھ کو دیکھ کر صورت محبت کی