har har ada buton ki hai qatil bara-e-dil

har har adā butoñ kī hai qātil barā-e-dil

āḳhir koī bachā.e to kyūñkar bachā.e dil

rahne do chup mujhe na suno mājrā-e-dil

maiñ hāl-e-dil kahūñ to abhī muñh ko aa.e dil

kab tak ye haa.e haa.e jigar haa.e haa.e dil

kar rahm ai ḳhudā-e-jigar ai ḳhudā-e-dil

'majzūb' ab kisī se bhalā kyā lagā.e dil

dil āshnā-e-dard hai dard āshnā-e-dil

hotā huuñ mahv-e-lazzat-e-dīd-e-fazā-e-dil

bāġh-o-bahār ziist haiñ ye dāġh-hā-e-dil

'majzūb' tū bhī ġhair ḳhudā se lagā.e dil

'ishq-e-butāñ hai banda-e-haq nā-sazā-e-dil

'majzūb' ab kisī se na yā-rab lagā.e dil

paa.e to terī yaad se bas chain paa.e dil

un gul-ruḳhoñ ke rañg pe hargiz na jaa.e dil

jhūTe ye phuul haiñ kahīñ dhokā na khaa.e dil

dam-bhar qarār lene nahīñ detā haa.e dil

kaisī ye paḌ ga.ī hai mire sar balā.e dil

ik sail-e-be-panāh hai har iqtizā-e-dil

aisā bhī koī haa.e na paa.e jo paa.e dil

itnā na hogā koī bhī sabr-āzmā-e-dil

sab se lagā.e tum se na koī lagā.e dil

ab ho chukī hai jurm se zaa.id sazā-e-dil

jaane do bas mu'āf bhī kar do kHatā-e-dil

do lafzoñ hī meñ kah diyā sab mājrā-e-dil

ḳhāmosh ho gayā ho koī kah ke hā-e-dil

kab tak rahūñ maiñ haa.e kashākash meñ mubtalā

qaabū 'atā ho dil pe bas ab ai ḳhudā-e-dil

dil jins-e-be-bahā hai magar tere vāste

bas ik nigāh-e-lutf hai ai jaañ bahā-e-dil

muddat se mere parda-nashīñ tere vāste

ḳhālī kiye hue huuñ maiñ ḳhalvat-sarā-e-dil

ai dard aaj qissa hī kar de tamām tū

kab tak ye roz-roz ke sadme uThā.e dil

paidā kiyā thā tū ne butoñ ko jo ai ḳhudā

rakh detā mere siine meñ patthar bajā.e dil

us shoḳh dilrubā kī DhiTā.ī to dekhiye

apne banā liye haiñ hazāroñ parā.e dil

uff kis balā kā husn hai kaisā siñgār hai

ā.īna dekhte ho kahīñ aa na jaa.e dil

'majzūb'-e-mast se tujhe nisbat hī shaiḳh kyā

tū pārsā-e-vaz' hai vo pārsā-e-dil

har har ada buton ki hai qatil bara-e-dil

aaKHir koi bachae to kyunkar bachae dil

rahne do chup mujhe na suno majra-e-dil

main haal-e-dil kahun to abhi munh ko aae dil

kab tak ye hae hae jigar hae hae dil

kar rahm ai KHuda-e-jigar ai KHuda-e-dil

'majzub' ab kisi se bhala kya lagae dil

dil aashna-e-dard hai dard aashna-e-dil

hota hun mahw-e-lazzat-e-did-e-faza-e-dil

bagh-o-bahaar zist hain ye dagh-ha-e-dil

'majzub' tu bhi ghair KHuda se lagae dil

'ishq-e-butan hai banda-e-haq na-saza-e-dil

'majzub' ab kisi se na ya-rab lagae dil

pae to teri yaad se bas chain pae dil

un gul-ruKHon ke rang pe hargiz na jae dil

jhuTe ye phul hain kahin dhoka na khae dil

dam-bhar qarar lene nahin deta hae dil

kaisi ye paD gai hai mere sar balae dil

ek sail-e-be-panah hai har iqtiza-e-dil

aisa bhi koi hae na pae jo pae dil

itna na hoga koi bhi sabr-azma-e-dil

sab se lagae tum se na koi lagae dil

ab ho chuki hai jurm se zaid saza-e-dil

jaane do bas mu'af bhi kar do kHata-e-dil

do lafzon hi mein kah diya sab majra-e-dil

KHamosh ho gaya ho koi kah ke ha-e-dil

kab tak rahun main hae kashakash mein mubtala

qabu 'ata ho dil pe bas ab ai KHuda-e-dil

dil jins-e-be-baha hai magar tere waste

bas ek nigah-e-lutf hai ai jaan baha-e-dil

muddat se mere parda-nashin tere waste

KHali kiye hue hun main KHalwat-sara-e-dil

ai dard aaj qissa hi kar de tamam tu

kab tak ye roz-roz ke sadme uThae dil

paida kiya tha tu ne buton ko jo ai KHuda

rakh deta mere sine mein patthar bajae dil

us shoKH dilruba ki DhiTai to dekhiye

apne bana liye hain hazaron parae dil

uff kis bala ka husn hai kaisa singar hai

aaina dekhte ho kahin aa na jae dil

'majzub'-e-mast se tujhe nisbat hi shaiKH kya

tu parsa-e-waz' hai wo parsa-e-dil