uTh jae abhi kaam len himmat se agar hum

uTh jaa.e abhī kaam leñ himmat se agar ham

ik yuuñ hī sā parda hai idhar vo haiñ udhar ham

vo sub.h ko ā.eñge ye sunte haiñ ḳhabar ham

ham bhī unheñ dekheñge jo dekheñ sahar ham

sau baar kiyā 'ahd na jā.eñge udhar ham

phir shauq se ho ho ga.e majbūr magar ham

dam bhar to bhalā koī hameñ jī ke dikhā de

kar laa.e haiñ jis haal meñ ik 'umr basar ham

ab shuġhl hai din raat tavāf-e-kū-e-jānāñ

manzil pe pahuñch kar bhī haiñ mashġhūl-e-safar ham

mahrūm dar-e-faiz se koī nahīñ jaatā

aa.e haiñ bahut duur se ye sun ke ḳhabar ham

sālik hameñ rakhnā nahīñ manzūr unhīñ ko

phir ho ga.e 'majzūb' milāte hī nazar ham

uTh jae abhi kaam len himmat se agar hum

ek yun hi sa parda hai idhar wo hain udhar hum

wo subh ko aaenge ye sunte hain KHabar hum

hum bhi unhen dekhenge jo dekhen sahar hum

sau bar kiya 'ahd na jaenge udhar hum

phir shauq se ho ho gae majbur magar hum

dam bhar to bhala koi hamein ji ke dikha de

kar lae hain jis haal mein ek 'umr basar hum

ab shughl hai din raat tawaf-e-ku-e-jaanan

manzil pe pahunch kar bhi hain mashghul-e-safar hum

mahrum dar-e-faiz se koi nahin jata

aae hain bahut dur se ye sun ke KHabar hum

salik hamein rakhna nahin manzur unhin ko

phir ho gae 'majzub' milate hi nazar hum