hijab auron ko duniya-e-dani malum hoti hai

hijāb auroñ ko duniyā-e-danī ma'alūm hotī hai

mujhe har sū tirī jalvagarī ma'alūm hotī hai

mizha tar haiñ na āñkhoñ meñ namī ma'alūm hotī hai

unheñ is dil ke rone par hañsī ma'alūm hotī hai

maiñ ronā apnā rotā huuñ to vo hañs hañs ke sunte haiñ

unhīñ dil kī lagī ik dal lagī ma’alūm hotī hai

mohabbat hai mohabbat phūñk Dālegī do-'ālam ko

ye chiñgārī sī jo dil meñ dabī ma’alūm hotī hai

ik aisā vaqt bhī aatā hai daurān mohabbat meñ

ki naġhma nauha aur shādī ġhamī ma’alūm hotī hai

jo maiñ din-rāt yuuñ gardan jhukā.e baiThā rahtā huuñ

tirī tasvīr sī dil meñ khiñchī ma’alūm hotī hai

magar 'majzūb' to mahv-e-ḳhayāl-e-zulf-e-pechāñ hai

tirī jo baat hai uljhī huī ma’alūm hotī hai

banā rakhī hai 'majzūb' apnī hālat kyuuñ ḳharāb aisī

tirī sūrat to ye achchhī bhalī ma'alūm hotī hai

hijab auron ko duniya-e-dani ma'alum hoti hai

mujhe har su teri jalwagari ma'alum hoti hai

mizha tar hain na aankhon mein nami ma'alum hoti hai

unhen is dil ke rone par hansi ma'alum hoti hai

main rona apna rota hun to wo hans hans ke sunte hain

unhin dil ki lagi ek dal lagi ma’alum hoti hai

mohabbat hai mohabbat phunk Dalegi do-'alam ko

ye chingari si jo dil mein dabi ma’alum hoti hai

ek aisa waqt bhi aata hai dauran mohabbat mein

ki naghma nauha aur shadi ghami ma’alum hoti hai

jo main din-raat yun gardan jhukae baiTha rahta hun

teri taswir si dil mein khinchi ma’alum hoti hai

magar 'majzub' to mahw-e-KHayal-e-zulf-e-pechan hai

teri jo baat hai uljhi hui ma’alum hoti hai

bana rakhi hai 'majzub' apni haalat kyun KHarab aisi

teri surat to ye achchhi bhali ma'alum hoti hai