hasinon mein dil lakh bahla rahe hain

hasīnoñ meñ dil laakh bahlā rahe haiñ

magar haaye phir bhī vo yaad aa rahe haiñ

tasavvur meñ vo bār-bār aa rahe haiñ

jhalak apnī parde se dikhlā rahe haiñ

kahīñ vo to dekho nahīñ aa rahe haiñ

ki ham dard-e-dil meñ kamī pā rahe haiñ

marīz-e-mohabbat meñ ab kyā dharā hai

jo baaqī haiñ vo saañs aa jā rahe haiñ

are uf ġhazab haiñ ye āñkheñ nashīlī

sambhālo are ham gire jā rahe haiñ

yahāñ un ko aanā nahīñ hai to phir kyuuñ

tasavvur meñ aa aa ke tarsā rahe haiñ

ye sab soch kar dil lagāyā hai nāseh

na.ī baat kyā aap farmā rahe haiñ

mujhe yaas kyuuñ ho ki vo dil meñ baiThe

barābar tasallī diye jā rahe haiñ

maiñ 'majzūb' huuñ kuchh samjhe to nāseh

bhalā aap bhī kis ko samjhā rahe haiñ

hasinon mein dil lakh bahla rahe hain

magar haye phir bhi wo yaad aa rahe hain

tasawwur mein wo bar-bar aa rahe hain

jhalak apni parde se dikhla rahe hain

kahin wo to dekho nahin aa rahe hain

ki hum dard-e-dil mein kami pa rahe hain

mariz-e-mohabbat mein ab kya dhara hai

jo baqi hain wo sans aa ja rahe hain

are uf ghazab hain ye aankhen nashili

sambhaalo are hum gire ja rahe hain

yahan un ko aana nahin hai to phir kyun

tasawwur mein aa aa ke tarsa rahe hain

ye sab soch kar dil lagaya hai naseh

nai baat kya aap farma rahe hain

mujhe yas kyun ho ki wo dil mein baiThe

barabar tasalli diye ja rahe hain

main 'majzub' hun kuchh samjhe to naseh

bhala aap bhi kis ko samjha rahe hain