teri chashm-e-mai-gun hai jam-e-mohabbat

tirī chashm-e-mai-gūñ hai jām-e-mohabbat

tirī zulf-e-mushkīñ hai dām-e-mohabbat

mire sāmne lo na nām-e-mohabbat

chhalak jā.egā haaye jām-e-mohabbat

vo deñ jaam aur vo bhī jām-e-mohabbat

to pī le na kyuuñ tishna-kām-e-mohabbat

ḳhudā ke liye dam to lene de ai dil

are Thahar o tez-gām-e-mohabbat

ḳhatā to ḳhud un kī aur ilzām ham par

sab ulTā hī dekhā nizām-e-mohabbat

kabhī is ke dil meñ kabhī us ke dil meñ

kahīñ bhī nahīñ hai qiyām-e-mohabbat

mohabbat meñ lāzim haiñ rusvā.iyāñ bhī

mohabbat nahīñ nek-nām-e-mohabbat

koī der se sar jhukā.e khaḌā hai

are ab to le-le salām-e-mohabbat

ḳhudā tujh ko 'majzūb' rakkhe salāmat

tujhī se hai duniyā meñ nām-e-mohabbat

teri chashm-e-mai-gun hai jam-e-mohabbat

teri zulf-e-mushkin hai dam-e-mohabbat

mere samne lo na nam-e-mohabbat

chhalak jaega haye jam-e-mohabbat

wo den jam aur wo bhi jam-e-mohabbat

to pi le na kyun tishna-kaam-e-mohabbat

KHuda ke liye dam to lene de ai dil

are Thahar o tez-gam-e-mohabbat

KHata to KHud un ki aur ilzam hum par

sab ulTa hi dekha nizam-e-mohabbat

kabhi is ke dil mein kabhi us ke dil mein

kahin bhi nahin hai qiyam-e-mohabbat

mohabbat mein lazim hain ruswaiyan bhi

mohabbat nahin nek-nam-e-mohabbat

koi der se sar jhukae khaDa hai

are ab to le-le salam-e-mohabbat

KHuda tujh ko 'majzub' rakkhe salamat

tujhi se hai duniya mein nam-e-mohabbat