تری چشم مے گوں ہے جام محبت

تری چشم مے گوں ہے جام محبت

تری زلف مشکیں ہے دام محبت

مرے سامنے لو نہ نام محبت

چھلک جائے گا ہائے جام محبت

وہ دیں جام اور وہ بھی جام محبت

تو پی لے نہ کیوں تشنہ کام محبت

خدا کے لئے دم تو لینے دے اے دل

ارے ٹھہر او تیز گام محبت

خطا تو خود ان کی اور الزام ہم پر

سب الٹا ہی دیکھا نظام محبت

کبھی اس کے دل میں کبھی اس کے دل میں

کہیں بھی نہیں ہے قیام محبت

محبت میں لازم ہیں رسوائیاں بھی

محبت نہیں نیک نام محبت

کوئی دیر سے سر جھکائے کھڑا ہے

ارے اب تو لے لے سلام محبت

خدا تجھ کو مجذوبؔ رکھے سلامت

تجھی سے ہے دنیا میں نام محبت