kya jaanen kis andaz se zalim ne nazar ki

kyā jāneñ kis andāz se zālim ne nazar kī

hālat hī digar-gūñ hai mire qalb-o-jigar kī

phuñktā huuñ shab-o-roz paḌā bistar-e-ġham par

hotī hai burī haaye lagī aag jigar kī

kaaTe nahīñ kaTtā tirī furqat kā zamāna

hotī nahīñ ab shaam jo mar mar ke sahar kī

aġhyār se hañs hañs ke kiyā karte haiñ bāteñ

parvā hī unheñ kyā hai kisī dīda-e-tar kī

andāz-e-taġhāful bhī to dil-kash hai tumhārā

jhaT pher liyā muñh ko jo bhūle se nazar kī

har lahza nigah kar ke girāte rahe bijlī

abhī ye ri'āyat hai mire soz-e-jigar kī

sab chhoḌ deñ us kushta-e-ġhaflat ko ḳhudā par

naaz un kā baḌhā aur bhī maiñ ne jo ḳhabar kī

kya jaanen kis andaz se zalim ne nazar ki

haalat hi digar-gun hai mere qalb-o-jigar ki

phunkta hun shab-o-roz paDa bistar-e-gham par

hoti hai buri haye lagi aag jigar ki

kaTe nahin kaTta teri furqat ka zamana

hoti nahin ab sham jo mar mar ke sahar ki

aghyar se hans hans ke kiya karte hain baaten

parwa hi unhen kya hai kisi dida-e-tar ki

andaz-e-taghaful bhi to dil-kash hai tumhaara

jhaT pher liya munh ko jo bhule se nazar ki

har lahza nigah kar ke giraate rahe bijli

abhi ye ri'ayat hai mere soz-e-jigar ki

sab chhoD den us kushta-e-ghaflat ko KHuda par

naz un ka baDha aur bhi main ne jo KHabar ki