jo hum tark-e-’alaiq kar ke ku-e-yar mein aae

jo ham tark-e-’alā.iq kar ke kū-e-yār meñ aa.e

to kHāristāñ se goyā gulshan-e-be-kHār meñ aa.e

maze sehat se baḌh kar 'ishq ke āzār meñ aa.e

na hargiz farq yārab hālat-e-bīmār meñ aa.e

tirī shīrīñ-zabānī kyā bhalā guftār meñ aa.e

maze iqrār ke ham ko tire inkār meñ aa.e

ḳhajil mahbūb sharminda pashemāñ ḳhvār nā-farmāñ

ġhulām-e-rū-siyah kyā le ke muñh darbār meñ aa.e

ġhazal-ḳhvāñ shādmāñ raqsāñ gahe giryāñ gahe ḳhandāñ

'ajab andāz se ham kūcha-e-dildār meñ aa.e

kahīñ 'ushshāq ke mele kahīñ jamghaT hasīnoñ ke

yahāñ kyā aa.e husn-o-'ishq ke bāzār meñ aa.e

chhuḌā kar jaan apnī be-tarah 'majzūb' bhāgā hai

ḳhudā hī hai jo phir vo lauT kar ghar-bār meñ aa.e

jo hum tark-e-’alaiq kar ke ku-e-yar mein aae

to kHaristan se goya gulshan-e-be-kHar mein aae

maze sehat se baDh kar 'ishq ke aazar mein aae

na hargiz farq yarab haalat-e-bimar mein aae

teri shirin-zabani kya bhala guftar mein aae

maze iqrar ke hum ko tere inkar mein aae

KHajil mahbub sharminda pasheman KHwar na-farman

ghulam-e-ru-siyah kya le ke munh darbar mein aae

ghazal-KHwan shadman raqsan gahe giryan gahe KHandan

'ajab andaz se hum kucha-e-dildar mein aae

kahin 'ushshaq ke mele kahin jamghaT hasinon ke

yahan kya aae husn-o-'ishq ke bazar mein aae

chhuDa kar jaan apni be-tarah 'majzub' bhaga hai

KHuda hi hai jo phir wo lauT kar ghar-bar mein aae