mere dil mein wurud-e-jalwa-e-jaanana hota hai

mire dil meñ vurūd-e-jalva-e-jānāna hotā hai

ye sab mā’mūra-e-’ālam abhī vīrāna hotā hai

nayā tauba-shikan jab dāḳhil-e-mai-kHāna hotā hai

na pūchho phir jo rañg-e-majlis-e-rindāna hotā hai

tarīq-e-'ishq meñ jo jis qadar dīvāna hotā hai

vo bas utnā hī ai ahl-e-ḳhirad farzāna hotā hai

haqīqat meñ to mai-ḳhāna jabhī mai-ḳhāna hotā hai

tire dast-e-karam meñ jab kabhī paimāna hotā hai

magar ai mohtasib tujh ko bhī hai kuchh zauq rindī kā

jabhī aatā hai tū jab rañg par mai-ḳhāna hotā hai

ba-zāhir dekhne meñ hotī hai saj-dhaj faqīrāna

dimāġh un ke gadāoñ kā magar shāhāna hotā hai

kabhī pesh-e-nazar vo gul kabhī nazroñ se poshīda

kabhī 'ālam gulistāñ aur kabhī vīrāna hotā hai

nahīñ 'majzūb' dam-bhar ko bhī terī yaad se ġhāfil

baḌā hushiyār matlab kā tirā dīvāna hotā hai

mere dil mein wurud-e-jalwa-e-jaanana hota hai

ye sab ma’mura-e-’alam abhi virana hota hai

naya tauba-shikan jab daKHil-e-mai-kHana hota hai

na puchho phir jo rang-e-majlis-e-rindana hota hai

tariq-e-'ishq mein jo jis qadar diwana hota hai

wo bas utna hi ai ahl-e-KHirad farzana hota hai

haqiqat mein to mai-KHana jabhi mai-KHana hota hai

tere dast-e-karam mein jab kabhi paimana hota hai

magar ai mohtasib tujh ko bhi hai kuchh zauq rindi ka

jabhi aata hai tu jab rang par mai-KHana hota hai

ba-zahir dekhne mein hoti hai saj-dhaj faqirana

dimagh un ke gadaon ka magar shahana hota hai

kabhi pesh-e-nazar wo gul kabhi nazron se poshida

kabhi 'alam gulistan aur kabhi virana hota hai

nahin 'majzub' dam-bhar ko bhi teri yaad se ghafil

baDa hushiyar matlab ka tera diwana hota hai