andaz wahi samjhe mere dil ki aah ka

andāz vahī samjhe mere dil kī aah kā

zaḳhmī jo ho chukā ho kisī kī nigāh kā

zāhid ko ham ne dekh liyā chuuñ nagīñ ba-aks

raushan huā hai naam to us rū-siyāh kā

har chand fisq meñ to hazāroñ haiñ lazzateñ

lekin ajab mazā hai faqat dil kī chaah kā

le kar azal se tā-ba-abad ek aan hai

gar darmiyāñ hisāb na ho sāl-o-māh kā

rahmat qadam na rañja kare gar tirī udhar

yā-rab hai kaun phir to hamāre gunāh kā

dil us mizha se rakhiyo na tū chash-e-rāstī

ai be-ḳhabar burā hai ye firqa sipāh kā

shāh-o-gadā se apne ta.iiñ kaam kuchh nahīñ

ne taaj kī havas na irāda kulāh kā

sau baar dekhīñ maiñ ne tirī bevafā.iyāñ

tis par bhī nit ġhurūr hai dil meñ nibāh kā

ai 'dard' chhoḌtā hī nahīñ mujh ko jazb-e-ishq

kuchh kahrubā se bas na chale barg-e-kāh kā

andaz wahi samjhe mere dil ki aah ka

zaKHmi jo ho chuka ho kisi ki nigah ka

zahid ko hum ne dekh liya chun nagin ba-aks

raushan hua hai nam to us ru-siyah ka

har chand fisq mein to hazaron hain lazzaten

lekin ajab maza hai faqat dil ki chah ka

le kar azal se ta-ba-abad ek aan hai

gar darmiyan hisab na ho sal-o-mah ka

rahmat qadam na ranja kare gar teri udhar

ya-rab hai kaun phir to hamare gunah ka

dil us mizha se rakhiyo na tu chash-e-rasti

ai be-KHabar bura hai ye firqa sipah ka

shah-o-gada se apne tain kaam kuchh nahin

ne taj ki hawas na irada kulah ka

sau bar dekhin main ne teri bewafaiyan

tis par bhi nit ghurur hai dil mein nibah ka

ai 'dard' chhoDta hi nahin mujh ko jazb-e-ishq

kuchh kahruba se bas na chale barg-e-kah ka