جی نہ اٹھوں کہیں پھر میں جو تو مارے دامن

جی نہ اٹھوں کہیں پھر میں جو تو مارے دامن

جھاڑ مت خاک پہ میرے یہ غبار دامن

دامن‌ دشت ہے پر لالۂ و گل سے یا رب

خون عاشق بھی کہیں ہووے بہار دامن

ہم کہ دامن سے لگے ہیں نہ کہیں چھٹ جاویں

ہر کھڑی کھینچ نہ بے رحم کنار دامن

تار باندھا ہے مرے اشک نے یاں تک جوں شمع

ہے وہی تار گریباں وہی تار دامن

جب وہ چاہے ہے کہ دامن کو اٹھا کر چلئے

ہنس کے رکھتا مری گردن پہ ہے بار دامن

فرش رہ آنکھیں تو کیں میں نے پہ میرے مژگاں

خار پا ہوویں کسو کے نہ یہ خار دامن

دردؔ تو کون ہے جو گرد پھٹکنے پاوے

دردؔ دامن ہے ترا صدقے نثار دامن