kyun na Dube rahen ye dida-e-tar pani mein

kyuuñ na Duube raheñ ye dīda-e-tar paanī meñ

hai banā misl-e-habāb apnā to ghar paanī meñ

ashk se mere faqat dāman-e-sahrā nahīñ tar

koh bhī sab haiñ khaḌe tā-ba-kamar paanī meñ

mardum-e-dīda mere ashk meñ yuuñ rahte haiñ

kab ye guzarāñ kare aur bashar paanī meñ

ātish-e-mai se jo saaqī ne use bhaḌkāyā

zāhid-e-ḳhushk huā kHuub hī tar paanī meñ

chashma-e-āb na ho chashma-e-ḳhurshīd se kam

sho.ala-rū tū kabhū muñh dekhe agar paanī meñ

jis taraf chāhau chalūñ ye vo sarābistāñ hai

vahm kahtā hai ki ab paañv na dhar paanī meñ

ālam-e-āb meñ juuñ ā.īna Duubā hī rahā

tū bhī dāman na kiyā 'dard' ne tar paanī meñ

kyun na Dube rahen ye dida-e-tar pani mein

hai bana misl-e-habab apna to ghar pani mein

ashk se mere faqat daman-e-sahra nahin tar

koh bhi sab hain khaDe ta-ba-kamar pani mein

mardum-e-dida mere ashk mein yun rahte hain

kab ye guzaran kare aur bashar pani mein

aatish-e-mai se jo saqi ne use bhaDkaya

zahid-e-KHushk hua kHub hi tar pani mein

chashma-e-ab na ho chashma-e-KHurshid se kam

shoala-ru tu kabhu munh dekhe agar pani mein

jis taraf chahau chalun ye wo sarabistan hai

wahm kahta hai ki ab panw na dhar pani mein

aalam-e-ab mein jun aaina Duba hi raha

tu bhi daman na kiya 'dard' ne tar pani mein