mast hun pir-e-mughan kya mujhko farmata hai tu

mast huuñ pīr-e-muġhāñ kyā mujh ko farmātā hai tū

pā-e-bos-e-ḳhum karūñ yā dast-bosī-e-subū

sub.h aur ḳhurshīd ke mānind merī jeb ko

chaak kā maujib hai tuuhī tuuhī asbāb-e-rafū

Taal denā us ko nit har tarah juuñ qibla-numā

phir mujhe har phir ke aa rahnā usī ke rū-ba-rū

aur afzūnī talab kī ba.ad marne ke huī

ḳhaak hone ne kiyā har zarra garm-e-justujū

terī kHūñ-āshāmiyāñ mash.hūr haiñ ai teġh-e-nāz

meñ qatra chhoḌe to piive hamārā hī lahū

jis tarah se sub.h ko hotā hai be-raunaq charāġh

dekh tujh ko uḌ gayā gulshan meñ gul kā rañg-o-bū

aur hoñ āmāda-e-mai-kHvārgī se mai-parast

sar agar kaaTe unhūñ kā mohtasib misl-e-kadū

baat ahl-e-dīd se karte haiñ yaañ raushan-zamīr

nit zabān-e-sham.a ko hai chashm hī se guftugū

sūrat-e-taqlīd meñ kab mā'nī-e-tahqīq haiñ

rañg go hai par gul-e-tasvīr meñ kīdhar hai bū

saiñkaḌoñ hī tuḳhm se is baaġh meñ nikle nihāl

tukH-e-dil kī bar na aa.ī 'dard' lekin aarzū

mast hun pir-e-mughan kya mujh ko farmata hai tu

pa-e-bos-e-KHum karun ya dast-bosi-e-subu

subh aur KHurshid ke manind meri jeb ko

chaak ka maujib hai tuhi tuhi asbab-e-rafu

Tal dena us ko nit har tarah jun qibla-numa

phir mujhe har phir ke aa rahna usi ke ru-ba-ru

aur afzuni talab ki baad marne ke hui

KHak hone ne kiya har zarra garm-e-justuju

teri kHun-ashamiyan mashhur hain ai tegh-e-naz

meñ qatra chhoDe to piwe hamara hi lahu

jis tarah se subh ko hota hai be-raunaq charagh

dekh tujh ko uD gaya gulshan mein gul ka rang-o-bu

aur hon aamada-e-mai-kHwargi se mai-parast

sar agar kaTe unhun ka mohtasib misl-e-kadu

baat ahl-e-did se karte hain yan raushan-zamir

nit zaban-e-shama ko hai chashm hi se guftugu

surat-e-taqlid mein kab ma'ni-e-tahqiq hain

rang go hai par gul-e-taswir mein kidhar hai bu

sainkaDon hi tuKHm se is bagh mein nikle nihaal

tukH-e-dil ki bar na aai 'dard' lekin aarzu