uski bahaar-e-husn ka dil mein hamare josh hai

us kī bahār-e-husn kā dil meñ hamāre josh hai

fasl-e-bahār jis ke haañ ek ye gul-farosh hai

baḳht-e-siyah ba-rañg-e-shab nit hī galīm-posh hai

sham.a bhī apne haañ agar hai to sadā ḳhamosh hai

ḳhalvat-e-dil dil kar diyā apne havās meñ ḳhalal

husn balā-e-chashm hai naġhma vabāl-e-gosh hai

hove to darmiyān se apne ta.iiñ uThā.iye

baar nahīñ hai aur kuchh sar hī vabāl-e-dosh hai

nāla-o-āh kījiye kHūn-e-jigar hī pīji.e

ahd-e-shabāb kahte haiñ mausam-e-nāv-o-vosh hai

be-ḳhabroñ ko phir kahīñ dast-e-qazā na chheḌ tū

misl-e-duhal har ek meñ varna bharā ḳhurūsh hai

gair-e-malāl zāhidā kyā hai tarīq-e-zuho meñ

dil ho shagufta jis jagah kūcha-e-mai-farosh hai

apne ta.iiñ to kaam kuchh kHirqa-o-jāmā se nahīñ

'dard' agar libās hai dīda-e-aib posh hai

us ki bahaar-e-husn ka dil mein hamare josh hai

fasl-e-bahaar jis ke han ek ye gul-farosh hai

baKHt-e-siyah ba-rang-e-shab nit hi galim-posh hai

shama bhi apne han agar hai to sada KHamosh hai

KHalwat-e-dil dil kar diya apne hawas mein KHalal

husn bala-e-chashm hai naghma wabaal-e-gosh hai

howe to darmiyan se apne tain uThaiye

bar nahin hai aur kuchh sar hi wabaal-e-dosh hai

nala-o-ah kijiye kHun-e-jigar hi pijie

ahd-e-shabab kahte hain mausam-e-naw-o-wosh hai

be-KHabron ko phir kahin dast-e-qaza na chheD tu

misl-e-duhal har ek mein warna bhara KHurush hai

gair-e-malal zahida kya hai tariq-e-zuho mein

dil ho shagufta jis jagah kucha-e-mai-farosh hai

apne tain to kaam kuchh kHirqa-o-jama se nahin

'dard' agar libas hai dida-e-aib posh hai