gar bagh mein KHandan wo mera lab-e-shakar aawe

gar baaġh meñ ḳhandāñ vo mirā lab-e-shakar aave

gul sāmne dāmāñ se muñh Dhāñp kar aave

qāsid se kaho phir ḳhabar ūdhar hī ko le jaa.e

yaañ be-ḳhabarī aa ga.ī jab tak ḳhabar aave

luuTe hai tire ganj-e-shahīdāñ ko ġharībī

jī dene ko zālim koī kis baat par aave

zāhid ko jatā dījiyo be-ḳhud hai ye rindāñ

aanā hai to ḳhud-dārī ko ghar meñ hī dhar aave

kahte haiñ ki yak-dast tirī teġh chalī hai

tab jāniye jab ik-do qadam chal idhar aave

juuñ ḳhvāb hai vābasta ba-ġhaflat ye tamāshā

khul jaa.e agar aañkh to phir kyā nazar aave

mutlaq bhī nahīñ 'dard' izāfat se mubarrā

ohde se taqayyud ke koī kyūñki bar aave

gar bagh mein KHandan wo mera lab-e-shakar aawe

gul samne daman se munh Dhanp kar aawe

qasid se kaho phir KHabar udhar hi ko le jae

yan be-KHabari aa gai jab tak KHabar aawe

luTe hai tere ganj-e-shahidan ko gharibi

ji dene ko zalim koi kis baat par aawe

zahid ko jata dijiyo be-KHud hai ye rindan

aana hai to KHud-dari ko ghar mein hi dhar aawe

kahte hain ki yak-dast teri tegh chali hai

tab jaaniye jab ik-do qadam chal idhar aawe

jun KHwab hai wabasta ba-ghaflat ye tamasha

khul jae agar aankh to phir kya nazar aawe

mutlaq bhi nahin 'dard' izafat se mubarra

ohde se taqayyud ke koi kyunki bar aawe