ji ki ji hi mein rahi baat na hone pai

jī kī jī hī meñ rahī baat na hone paa.ī

ek bhī us se mulāqāt na hone paa.ī

dīd-vā-dīd huī duur se merī us kī

par jo maiñ chāhā thā so baat na hone paa.ī

kaun vo be-sar-o-sāmāñ hai ki yā-rab juz-e-ashk

jis kī ḳhātir kahīñ barsāt na hone paa.ī

uTh chale shaiḳh-jī tum majlis-e-rindāñ se shitāb

ham se kuchh kHuub mudārāt na hone paa.ī

jī meñ manzūr thī jo aap kī khidmat-gārī

so to ai qibla-e-jāt na hone paa.ī

jī fanā ho gayā ik nigah-e-garm ke saath

'dard' kuchh aur ināyāt na hone paa.ī

ji ki ji hi mein rahi baat na hone pai

ek bhi us se mulaqat na hone pai

did-wa-did hui dur se meri us ki

par jo main chaha tha so baat na hone pai

kaun wo be-sar-o-saman hai ki ya-rab juz-e-ashk

jis ki KHatir kahin barsat na hone pai

uTh chale shaiKH-ji tum majlis-e-rindan se shitab

hum se kuchh kHub mudaraat na hone pai

ji mein manzur thi jo aap ki khidmat-gari

so to ai qibla-e-jat na hone pai

ji fana ho gaya ek nigah-e-garm ke sath

'dard' kuchh aur inayat na hone pai