jo yan kuchh chahne wale qarib-e-yak-digar baiThe

jo yaañ kuchh chāhne vaale qarīb-e-yak-digar baiThe

ham apnā dil baġhal meñ daab lekar aah kar baiThe

na pūchho ishq kī sozish ne a.alam meñ kyā-kyā kiyā

ajab tūfāñ uThā.e ye ke jis se ghar ke ghar baiThe

mohabbat ne tumhārī dil meñ bhī itnā to sar khīñchā

qasam khāne lage tab haath mere sar pe dhar baiThe

koī din aur bhī ham ko phirā le gardish-e-daurāñ

nahīñ uThne ke phir hargiz kahīñ ab ke agar baiThe

na aanā thā bharā jī meñ so ab to kuchh karo ḳhālī

ke din jitne the va.adoñ ke na milne se hī bhar baiThe

koī baiTh us kane yaañ jā sake hai is tarah jaldī

chale the har ghaḌī uTh-uTh ke ham ai 'dard' par baiThe

jo yan kuchh chahne wale qarib-e-yak-digar baiThe

hum apna dil baghal mein dab lekar aah kar baiThe

na puchho ishq ki sozish ne aalam mein kya-kya kiya

ajab tufan uThae ye ke jis se ghar ke ghar baiThe

mohabbat ne tumhaari dil mein bhi itna to sar khincha

qasam khane lage tab hath mere sar pe dhar baiThe

koi din aur bhi hum ko phira le gardish-e-dauran

nahin uThne ke phir hargiz kahin ab ke agar baiThe

na aana tha bhara ji mein so ab to kuchh karo KHali

ke din jitne the wadon ke na milne se hi bhar baiThe

koi baiTh us kane yan ja sake hai is tarah jaldi

chale the har ghaDi uTh-uTh ke hum ai 'dard' par baiThe