ham-chashmi hai wahshat ko meri chashm-e-sharar se

ham-chashmī hai vahshat ko mirī chashm-e-sharar se

aate hī nazar phir vahīñ ġhā.eb ho nazar se

ai ham-vatnān ab kī ye ġhairat-zada hargiz

phirne kā nahīñ umr ke mānind safar se

kyuuñ teġh tirī dushmanī kartī hai mere saath

mujh ko to nahīñ kaam kiso kī bhī kamar se

ka.abe bhī bhalā shaiḳh tire saath chaleñge

kidhar ko phireñge ham agar yaar ke ghar se

is tarah ke rone se to jī apnā ruke hai

ai kaash ye abr-e-mizha dil khol ke barse

khultī hai mirī aañkh jo ahvāl pe apne

juuñ sham.a ghaTā jaatā huuñ apnī nazar se

ai sañg jo kuchh tuune kiyā shīshe ke haq meñ

karatā hai koī bhī ye sulūk apne jigar se

ham-chashmi hai wahshat ko meri chashm-e-sharar se

aate hi nazar phir wahin ghaeb ho nazar se

ai ham-watnan ab ki ye ghairat-zada hargiz

phirne ka nahin umr ke manind safar se

kyun tegh teri dushmani karti hai mere sath

mujh ko to nahin kaam kiso ki bhi kamar se

kabe bhi bhala shaiKH tere sath chalenge

kidhar ko phirenge hum agar yar ke ghar se

is tarah ke rone se to ji apna ruke hai

ai kash ye abr-e-mizha dil khol ke barse

khulti hai meri aankh jo ahwal pe apne

jun shama ghaTa jata hun apni nazar se

ai sang jo kuchh tune kiya shishe ke haq meñ

karata hai koi bhi ye sulūk apne jigar se