dil ko jab pahle hi kho baiThe hain hum

dil ko jab pahle hī kho baiThe haiñ ham

itne tab be-fikr ho baiThe haiñ ham

justujū dil kī tū siine meñ na kar

muddateñ guzrīñ ki ro baiThe haiñ ham

uTTheñ us ke dar se ye mumkin nahīñ

sar ko chāho kaaT lo baiThe haiñ ham

dard-e-dil ko tum suno yā mat suno

daad dil kī do na do baiThe haiñ ham

'ishq meñ sābit qadam rakkhe ḳhudā

jo kuchh ab honī hai ho baiThe haiñ ham

dīn-o-īmāñ aur dil-o-jāñ rā.egāñ

'ishq' kyā kyā apnā kho baiThe haiñ ham

dil ko jab pahle hi kho baiThe hain hum

itne tab be-fikr ho baiThe hain hum

justuju dil ki tu sine mein na kar

muddaten guzrin ki ro baiThe hain hum

uTThen us ke dar se ye mumkin nahin

sar ko chaho kaT lo baiThe hain hum

dard-e-dil ko tum suno ya mat suno

dad dil ki do na do baiThe hain hum

'ishq mein sabit qadam rakkhe KHuda

jo kuchh ab honi hai ho baiThe hain hum

din-o-iman aur dil-o-jaan raegan

'ishq' kya kya apna kho baiThe hain hum