tere wasl mein lutf kya kya na dekha

tire vasl meñ lutf kyā kyā na dekhā

na dekhā so dekhā jo dekhā na dekhā

ḳhudā jaane kyā muñh-bharā.ī dī us ko

lab-e-zaḳhm-e-dil jo kabhī vā na dekhā

maiñ ro-ro ke aañsū se kī shīsha-bāzī

ye hañs-hañs ke tū ne tamāsha na dekhā

karīmī tirī jab se samjhā huuñ dil meñ

kabhī fikr-e-imroz fardā na dekhā

ḳhudā kī ḳhudā.ī hai qaa.em pe tujh sā

na dekhā na dekhā na dekhā na dekhā

sabhī dā’va-e-'ishq rakhte haiñ lekin

koī 'ishq' sā ham ne rusvā na dekhā

tere wasl mein lutf kya kya na dekha

na dekha so dekha jo dekha na dekha

KHuda jaane kya munh-bharai di us ko

lab-e-zaKHm-e-dil jo kabhi wa na dekha

main ro-ro ke aansu se ki shisha-bazi

ye hans-hans ke tu ne tamasha na dekha

karimi teri jab se samjha hun dil mein

kabhi fikr-e-imroz farda na dekha

KHuda ki KHudai hai qaem pe tujh sa

na dekha na dekha na dekha na dekha

sabhi da’wa-e-'ishq rakhte hain lekin

koi 'ishq' sa hum ne ruswa na dekha