kaba mein phir dair mila tha makan mujhe

kā'ba meñ phir dair milā thā makāñ mujhe

laayā hai 'ishq khīñch kahāñ se kahāñ mujhe

'ālam ke nek-o-bad se kisī ko nahīñ hai kaam

detī nahīñ hai chain ye merī zabāñ mujhe

kyā zindagī jo yaar judā hue yaar se

vaañ tujh ko taa’n karte haiñ aur yaar yaañ mujhe

aage to qadr-dānī pe mushfiq mirī na thī

hañs hañs ke ab jo kahte ho tum mehrbāñ mujhe

ranj-e-firāq-o-sorish-e-dil aur kHayāl-e-rashk

juz vasl chain kyuuñ ke ho ai dostāñ mujhe

ye aarzū hai merī ki ai 'ishq pesh-e-marg

apnā nishāñ to dījiyo ai be-nishāñ mujhe

ka'ba mein phir dair mila tha makan mujhe

laya hai 'ishq khinch kahan se kahan mujhe

'alam ke nek-o-bad se kisi ko nahin hai kaam

deti nahin hai chain ye meri zaban mujhe

kya zindagi jo yar juda hue yar se

wan tujh ko ta’n karte hain aur yar yan mujhe

aage to qadr-dani pe mushfiq meri na thi

hans hans ke ab jo kahte ho tum mehrban mujhe

ranj-e-firaq-o-sorish-e-dil aur kHayal-e-rashk

juz wasl chain kyun ke ho ai dostan mujhe

ye aarzu hai meri ki ai 'ishq pesh-e-marg

apna nishan to dijiyo ai be-nishan mujhe