dil-e-diwana agar qabil-e-didar na tha

dil-e-dīvāna agar qābil-e-dīdār na thā

un shikastoñ ke bhī laa.eq to mire yaar na thā

zard in āñkhoñ ke aage nahīñ nargis ye faqat

kaun ḳhush-chashm tirī chashm kā bīmār na thā

maiñ to dīvāna na thā DhūñDhtā jo jhaaḌ pahāḌ

kaun sī shai thī jahāñ sho'la-e-dīdār na thā

nushkHa-e-vahdat-o-kasrat kā tafāvut samjhā

ḳhuub dekhā to ba-juz parda-e-pindār na thā

kis jafā-kār ko dil tū ne diyā ġhaur to kar

aur duniyā meñ magar koī tarh-dār na thā

saaf shikastī kā bayāñ us ke kahāñ tak kiije

tiir aisā koī thā siina ke jo paar na thā

'ishq' hī ham ko satātā hai hamārā yaaro

varna mā'shūq kabhī dar pai āzār na thā

dil-e-diwana agar qabil-e-didar na tha

un shikaston ke bhi laeq to mere yar na tha

zard in aankhon ke aage nahin nargis ye faqat

kaun KHush-chashm teri chashm ka bimar na tha

main to diwana na tha DhunDhta jo jhaD pahaD

kaun si shai thi jahan sho'la-e-didar na tha

nushkHa-e-wahdat-o-kasrat ka tafawut samjha

KHub dekha to ba-juz parda-e-pindar na tha

kis jafa-kar ko dil tu ne diya ghaur to kar

aur duniya mein magar koi tarh-dar na tha

saf shikasti ka bayan us ke kahan tak kije

tir aisa koi tha sina ke jo par na tha

'ishq' hi hum ko satata hai hamara yaro

warna ma'shuq kabhi dar pai aazar na tha