دل دیوانہ اگر قابل دیدار نہ تھا

دل دیوانہ اگر قابل دیدار نہ تھا

ان شکستوں کے بھی لائق تو مرے یار نہ تھا

زرد ان آنکھوں کے آگے نہیں نرگس یہ فقط

کون خوش چشم تری چشم کا بیمار نہ تھا

میں تو دیوانہ نہ تھا ڈھونڈھتا جو جھاڑ پہاڑ

کون سی شے تھی جہاں شعلۂ دیدار نہ تھا

نسخۂ وحدت و کثرت کا تفاوت سمجھا

خوب دیکھا تو بجز پردۂ پندار نہ تھا

کس جفا کار کو دل تو نے دیا غور تو کر

اور دنیا میں مگر کوئی طرح دار نہ تھا

صاف شکستی کا بیاں اس کے کہاں تک کیجے

تیر ایسا کوئی تھا سینہ کے جو پار نہ تھا

عشقؔ ہی ہم کو ستاتا ہے ہمارا یارو

ورنہ معشوق کبھی در پئے آزار نہ تھا