zahe nasib haram-o-halal se waqif

zahe nasīb harām-o-halāl se vāqif

merā shu.ūr hai duniyā kī chaal se vāqif

libās-e-jism ko anjām kī ḳhabar hī nahīñ

hai merī ruuh magar intiqāl se vāqif

takbburāna ye lahja yahī batātā hai

terā uruuj hai tere zavāl se vāqif

misāl auroñ kī deñge vo kyuuñ zamāne ko

jo mustafā kī haiñ har ik misāl se vāqif

usī ne bhar diye kaase meñ tanz ke jumle

vo jab ki thā mere dast-e-savāl se vāqif

ye qahqahoñ ke musāfir bhī umr bhar na rahe

kisī ke ġham na rañj-o-malāl se vāqif

zarūratoñ ko maiñ paḌhtā thā jis ke chehre se

vo ho sakā na kabhī mere haal se vāqif

maiñ is liye bhī to 'shāyāñ' sabr karatā huuñ

ḳhudā kī zaat hai mere ḳhayāl se vāqif

zahe nasib haram-o-halal se waqif

mera shuur hai duniya ki chaal se waqif

libas-e-jism ko anjam ki KHabar hi nahin

hai meri ruh magar intiqal se waqif

takbburana ye lahja yahi batata hai

tera uruj hai tere zawal se waqif

misal auron ki denge wo kyun zamane ko

jo mustafa ki hain har ek misal se waqif

usi ne bhar diye kase mein tanz ke jumle

wo jab ki tha mere dast-e-sawal se waqif

ye qahqahon ke musafir bhi umr bhar na rahe

kisi ke gham na ranj-o-malal se waqif

zaruraton ko main paDhta tha jis ke chehre se

wo ho saka na kabhi mere haal se waqif

main is liye bhi to 'shayan' sabr karata hun

KHuda ki zat hai mere KHayal se waqif