na yahan koi ruka hai na yahan pe hum rahainge

na yahāñ koī rukā hai na yahāñ pe ham rahaiñge

na ye zindagī rahegī na ye pech-o-ḳham raheñge

agar ham amal se apne na badal sake zamāna

to diloñ meñ muddatoñ tak yahī ranj-o-ġham rahaiñge

ye na.e na.e musāfir kahāñ baiTh jaa.eñ thak kar

jo purāne ham-safar haiñ vahī dam-qadam raheñge

ye jo āshnā-e-haq haiñ nahīñ Darte vo qazā se

yūñhī sar qalam the un ke yūñhī sar qalam rahaiñge

ye sanam haiñ shaḳhsiyat ke inheñ toḌ Daalo varna

the zehn meñ nasl-e-nau ke ye yūñhī sanam rahaiñge

the jo zaḳhm ḳhanjaroñ ke vo kabhī ke bhar chuke haiñ

vo jo zaḳhm tanz ke haiñ vo sadā raqam rahaiñge

vo jo ik ḳhudā hai apnā 'shāyāñ' apne sar to

usī dar pe ḳham rahe haiñ usī dar pe ḳham rahaiñge

na yahan koi ruka hai na yahan pe hum rahainge

na ye zindagi rahegi na ye pech-o-KHam rahenge

agar hum amal se apne na badal sake zamana

to dilon mein muddaton tak yahi ranj-o-gham rahainge

ye nae nae musafir kahan baiTh jaen thak kar

jo purane ham-safar hain wahi dam-qadam rahenge

ye jo aashna-e-haq hain nahin Darte wo qaza se

yunhi sar qalam the un ke yunhi sar qalam rahainge

ye sanam hain shaKHsiyat ke inhen toD Dalo warna

the zehn mein nasl-e-nau ke ye yunhi sanam rahainge

the jo zaKHm KHanjaron ke wo kabhi ke bhar chuke hain

wo jo zaKHm tanz ke hain wo sada raqam rahainge

wo jo ek KHuda hai apna 'shayan' apne sar to

usi dar pe KHam rahe hain usi dar pe KHam rahainge