zaban-o-dil se gae aur jigar se jaan se gae

zabān-o-dil se ga.e aur jigar se jaañ se ga.e

tumhāre ishq meñ jaane kahāñ kahāñ se ga.e

mujhe zamīn kī gahrā.iyoñ meñ DhūñDoge

merī rasā.ī ke pahlū jo āsmāñ se ga.e

ab un guloñ ke mahakne kī kyā tavaqqo.a hai

zarā jo shāḳh se haTte hī gulistāñ se ga.e

vo tanz lauT ke aa.eñ ye ġhair mumkin hai

jo harf harf nikal kar terī zabāñ se ga.e

vo kāmyābī kī masnad ko chhū na paa.e

jo qadam qadam pe zamāne ke imtihāñ se ga.e

jinheñ milā hī nahīñ hai shu.ūr jiine kā

jahāñ meñ rahte hue bhī vo do-jahāñ se ga.e

supurd-e-ḳhāk kiye jin kī ho ga.ī muddat

zehn se mere na vo dil ke āshiyāñ se ga.e

karūñ zabān se 'shāyāñ' kyā sanā un kī

guzar ke ek hī shab meñ jo lā-makāñ se ga.e

zaban-o-dil se gae aur jigar se jaan se gae

tumhaare ishq mein jaane kahan kahan se gae

mujhe zamin ki gahraiyon mein DhunDoge

meri rasai ke pahlu jo aasman se gae

ab un gulon ke mahakne ki kya tawaqqoa hai

zara jo shaKH se haTte hi gulistan se gae

wo tanz lauT ke aaen ye ghair mumkin hai

jo harf harf nikal kar teri zaban se gae

wo kaamyabi ki masnad ko chhu na pae

jo qadam qadam pe zamane ke imtihan se gae

jinhen mila hi nahin hai shuur jine ka

jahan mein rahte hue bhi wo do-jahan se gae

supurd-e-KHak kiye jin ki ho gai muddat

zehn se mere na wo dil ke aashiyan se gae

karun zaban se 'shayan' kya sana un ki

guzar ke ek hi shab mein jo la-makan se gae