kaise karen hum aaj ke haalat ka gila

kaise kareñ ham aaj ke hālāt kā gila

bāteñ haiñ be-shumār ho kis baat kā gila

shikva hai be-dalīl-sā bārish ko dhuup se

aur dhuup kī zabāñ pe hai barsāt kā gilā

maanā ke har qadam pe hai dushvāriyāñ bahut

achchhā nahīñ hai kījiye har baat kā gilā

is daur-e-inqilāb meñ ḳhud kaam kījiye

kab tak kareñge aap yuuñ māfāt kā gila

is daur-e-inhitāt meñ kyā kyā gila suneñ

karne lage ġhulām hī sādāt kā galā

qātil ko qatl karne kā in.aam kyā milā

maqtūl ke laboñ pe hai be-bāt kā gilā

duniyā meñ kaam hotā hai hosh-o-havās se

tum kar rahe ho aaj bhī jazbāt kā gilā

'shāyān' ham ne soch meñ sadiyāñ guzār diiñ

kuchh log karte rahte haiñ lamhāt kā gilā

kaise karen hum aaj ke haalat ka gila

baaten hain be-shumar ho kis baat ka gila

shikwa hai be-dalil-sa barish ko dhup se

aur dhup ki zaban pe hai barsat ka gila

mana ke har qadam pe hai dushwariyan bahut

achchha nahin hai kijiye har baat ka gila

is daur-e-inqilab mein KHud kaam kijiye

kab tak karenge aap yun mafat ka gila

is daur-e-inhitat mein kya kya gila sunen

karne lage ghulam hi sadat ka gala

qatil ko qatl karne ka inam kya mila

maqtul ke labon pe hai be-baat ka gila

duniya mein kaam hota hai hosh-o-hawas se

tum kar rahe ho aaj bhi jazbaat ka gila

'shayan' hum ne soch mein sadiyan guzar din

kuchh log karte rahte hain lamhat ka gila